وجاہت حسین الحنفی

ابنِ یاسر کی سَطوَت پہ لاکھوں سلام

شہسوارِ شہادت پہ لاکھوں سلام

جس نے قحطِ وفا میں دیا حق کا ساتھ

صاف گوئی کی حشمت پہ لاکھوں سلام

آنکھ میں ڈال کر آنکھ للکارے جو

ایسی جاہ و جلالت پہ لاکھوں سلام

ظلمتِ دہر میں مشعلِ حق بیں جو

ایسے ھادی کی طلعت پہ لاکھوں سلام

فارقِ حق و باطل ہیں یاسر کے چاند

آیتِ حق کی رفعت پہ لاکھوں سلام

اللہ اللہ کیا والدین و ولد!

خاندانِ شہادت پہ لاکھوں سلام

داعیِ سوئے دوزخ پہ ہو جو بھی ہو

داعیِ سوئے جنت پہ لاکھوں سلام

کُو بہ کُو نعرۂ ابنِ یاسر لگے

“یارِ حیدر کی عظمت پہ لاکھوں سلام”