صَلُّوْا عَلَیْہِ وَاٰلِہٖ

تری شان ذکر کروں تو کیا
تجھے حق نے ایسا بنا دیا!
کہ ترے لیے سرِ دوسرا
نہ مثیل ہے نہ مثال ہی
صَلُّوْا عَلَیْہِ وَاٰلِہٖ

سرِ لامکاں جو فراز تھا
ترے پائوں نے اُسے چُھو لیا
نہ گزر جہاں مرے وہم کا
جسے پا سکے نہ خیال ہی
صَلُّوْا عَلَیْہِ وَاٰلِہٖ

سرِ حشر اک ترا آسرا
نہ مری فغاں میں دمِ رسا
نہ کمال و فیض لبِ دعا
نہ مرے عمل کا مآل ہی
صَلُّوْا عَلَیْہِ وَاٰلِہٖ

کبھی آئی کوئی کٹھن گھڑی
ترے دیں کو جب بھی طلب ہوئی
سرِ نوکِ نیزہ گواہی دی
تری آلؑ ہے تری آلؑ ہی
صَلُّوْا عَلَیْہِ وَاٰلِہ

کلام- ثاقب اکبر